Golaha Dhaqanka Beelaha Hawiye oo ku baaqay in Shacabka magaalada Muqdisho laga joojiyo dagaalada aan kala go'a lahayn.
Nabadoon Maxamed Xasan Xaad oo maanta shir jraa'id ku qabtay magaalada Muqdisho ayaa codsaday in la joojiyo dagaalada kadhacaya gobolada Banaadir iyo Mudug, waxaana uu sheegay in dagaalada kuwa aan dan ku jirin balse lagu daadinayo dhiigga shacabka Soomaaliyeed.
MudugNet, Muqdisho, Axad, 7da Maarso, 2010.
Xaad ayaa ka codsaday dhinacyada ku dagaalamaya magaalada Muqdisho inay u turaan shacabka Soomaaliyeed oo ay ka joojiyaan dagaalada iyo duqeymaha, waxaana uu sheegay in dhibataada ugu badan ay soo gaarayso shacabka Soomaaliyeed.
Sidoo kale wuxuu baaq nabadeed u jeediyey beelaha walaalaha ah ee ku dagaalamaya deegaanka Bacaadweyn ee gobolka Mudug, waxaana uu kacodsaday inay si dhaqso ah u soo afjaraan dirirta taas badalkeeda ay wada hadlaan.
"Waxaan ku baaqaynaa in dagaalad la joojiyo, oo dadka Soomaaliyeed la badbaadiyo hambada ka hartay, waxaan mar 2-aad iyo mar 3-aad ku celinayaa in dagaalada la joojiyo oo wada hadal lagu badalo si looga baxo dhibaatada dalka kajirta waa in caqliga wanaagsan taliyaa" ayuu yiri Nabadoon Xaad.
Mudugnet.com Xafiiska Wararka Magaalada Muqdisho
