Yuusuf Indha Cadde "Al Shabaab wax guulo ah kama gaarin dagaalkii shalay iyo xalay socday waan iska caabinay".
MudugNet, Muqdisho, Arbaco, 3da Maarso, 2010.
Dowladda Federaalka Somalia ayaa guulo waaweyn ka sheegatay dagaaladii cuslaa ee shalay ka dhacay magaalada Muqdisho gaar ahaan deegaano katirsan degamada Hodon magaalada Muqdisho oo shalay siyaaba kala duwan ay dhinacyadu ukala qabsadeen.
Wasiiru dowlaha Gaashaandhigga dowladda KMG ah ee Somalia Yuusuf Maxamed Siyaad Indhacadde oo la hadlay warbaahinta magaalada Muqdisho ayaa sheegay in dowladdu ay guulo ka gaartay dagaaladii kadhacay degmada Hodan ee magaalada Muqdisho.
Yuusuf Indhacadde ayaa sheegay in ciidamada dowladda KMG ah ay dagaalada ku dileen saraakiil sarsare oo katirsan xoogagga hubaysan ee kahorjeeda dowladda sida uu hadalka u dhigay, waxaana uu sheegay in ciidamada dowladda KMG ah ay weli ku sugan yihiin farsiimadii ay horay u joogeen.
Indhacadde ayaa waxba kama jiraan ku tilmaamay guulo ururka Al-shabaab uu ka sheegtay dagaalka, isagoona xusay in ururka Al-shabaab uu doonayo inuu marin habaabiyo shacabka Soomaaliyeed islamarkaana uu had iyo jeer sheego warar xaqiiqda ka fog.
"Kooxaas waxba guul ah ma gaarin way nasoo weerareen waana iska difaacnay warka shabaab waa mid waali ah waxay doonayaan in ay shacabka wareeriyaan"ayuu yiri Indha Cadde.
Mudugnet.com Xafiiska Wararka magaalada Muqdisho
