Yuusuf Indha Cadde "WFP dhanka dowladda ha usoo wareegto amaankeeda dowladda ayaa sugaysa yaysan shaqada joojin".
MudugNet, Muqdisho, Axad, 28ka Feberaayo, 2010.
Dowladda KMG Somalia ayaa cambaaraysay xayiraad ay Al Shabaab kusoo rogtay howlihii shaqo oo ay waday Hay'adda cunada aduunka WFP, dowladu waxay sheegtay in ay diyaar u tahay sugidda amaanka shaqaalaha hay'adaasi
Yuusuf Maxamed Siyaad Indhacadde wasiiru dowlaha Gaashaandhigga dowladda KMG ah oo maanta shir jaraa'id ku qabtay magaalada Muqdisho ayaa sheegay in xayiraadda ururka Al-shabaab uu ku soo rogay hay'adda WFP ay tahay mid caqabad ku ah gargaarka ay hay'adda WFP siin jirtay shacabka Soomaaliyeed.
Indhacadde ayaa sheegay in dowladda KMG ah ay ka go'an tahay inay gacan weyn ka geysato sidii hay'adda WFP ay gargaar iyo kaalmo u siin laheyd shacabka Soomaaliyeed, waxaana uu ugu baaqay hay'adda WFP inay sii wado howlihii ay ka heysay konfurta dalka Somalia.
"Hay'adda WFP waa inay sii wadaa howlihii ay ka waday konfurta Somalia oo aysan dhag jalaq u siin amarka kooxaha nabad diidka ah" ayuu yiri Yuusuf Maxamed Siyaad Indhacadde wasiiru dowlaha Gaashaandhigga dowladda KMG ah.
Yuusuf Indhacadde ayaa carabka ku dhuftay in dowladda KMG ah ay dhawaan la wareegi doonto gacan ku heynta deegaano badan oo hadda gacanta ugu jira xoogagga Al-shabaab, waxaana uu ka gaabsaday inuu sharaxaad ka bixiyo qaabka ay dowladdu ula wareegayso deegaanada gaacanta ugu jira ururka Al-shabaab.
Mudugnet.com Xafiiska Wararka Magaalada MuqdishoFaallo:
Yuusufeey ayaa noqday Shaqsigii ugu horeyay ee Kooxda Alshabaab Howlgalkoodii ka bilabeen iyagoo ka soo eryay Marka hubkiina ka dhigay, iyagoo weli ku sii raad jooga waxaa u baxay Adeerkiis Xasan Daahir Aweysow oo ka reebay Shabaabkii hubkiina uga soo celiyay.Waxaa la yaab leh wixii Dowladdu Afhayeeno laheyd Ciidanku Afhayeeno lahaa waxaa maalin kasta ka qeylisiiyo Yuusufeey, Aaway Kaalmooy, Qeeyloow, Ceeymoow iyo Cabdi Xaaji Goobdoon.
Waase yaabee Yuusufeey ma xishoodo miyaa markii todobaad kasta uu Saxaafadda u sheego Dowladdu waddanka maalmo gudaheed ayay kula wareegeysaa, Haddana wax talaabo ah aan la qaadin, ilaa isaga lagu weeraro Xaafadaha fara ku tiriska ee Dowladda ayaanka darani ka arimiso.Yuusufeey hadaan talo siiyo waxaan oran lahaa weli Sharaf ayaad agteena ka leedahayee ha noqon sidii doqonka Yuusuf Garaad ee Tolka aad tihiin ee Xalaal iyo Xaaraam wuxuu doono Sheego Xishoodkiyo istaxyaduna ka luntay welina la isha daran Kaneecadii Guriceel ku soo cuntay.
Abtidoon Aw-Aflagaado
MudugNet Editor.
