Ciidamo katirsan Ururka Xisbul Islaam oo la sheegay in ay iskusoo dhiibeen dowladda KMG Somalia
MudugNet, Muqdisho, Sabti, 27ka Feberaayo, 2010.
Dowladda KMG Somalia ayaa maanta soo bandhigtay ciidamo katirsanaa Xisbul islaam oo la sheegay in ay fariisimo ku lahaayeen degmada H/wadaag magaalada Muqdisho oo kamid ah meelaha ay Islaamiyiinta maamulaan.
Guddoomiyaha degmada Wadajir Axmed Xasan Cadow Axmed Daaci oo la hadlay warbaahinta ayaa sheegay inay isku soo dhiibeen 6-kamid ah dhalinyaro ka tirsanaa ururka Xizbul Islaam.
Axmed Daaci ayaa sheegay in dhalinyaradaan ay isku soo dhiibeen ciidamadooda ku sugan deegaanka Kax Shiiqaal, isagoona sheegay in si iskood ah ay isku soo dhiibeen oo aan lagu qaban dagaal.
"Dhalinyarada aad aragtaan oo katirsanaa ururka Xizul Islaam waxay isku soo dhiibeen ciidamada Dowladda KMG ah ee maamulka degmada Wadajir markii ay u adkaysan waayeen dhibaatada lagu hayo shacabka" ayuu yiri Axmed Xasan Cadow Axmed Daaci guddoomiyaha degmada Wadajir.
Gudoomiyaha degmada Wadajir ee maamulka Gobolka Banaadir ayaa u mahad celiyey dhalinyarada isku soo dhiibay maamulkiisa, isagoona sheegay inaan la dhibaataysan doonin islamarkaana aan loo raacan doonin qaladaadkii ay horay u galeen.
