Warar sheegaya in Xilkii Afhayeenimo laga qaaday Sheekh Maxamed Macalin Afhayeenkii Xisbul Islaam kadib khilaaf soo kala dhaxgalay kooxaha Islaamiyiinta ah.
MudugNet, Muqdisho, arbaco, 24ka Feberaayo, 2010.
kadib khilaafaadyo xoogan oo soo kala dhaxgalay Al Shabaab iyo Ururka Xisbul islaam ayay socdaan kulamo ladoonayo in lagu baajiyo dagaal ka dhaca deegaanada ay magaalada Muqdisho ka maamulaan xoogagaasi dowlada KMG ah ladagaashan.
Warar aan la xaqiijin oo la isla dhex marayo ayaa sheegaya in hogaanka sare ee ururka Xizbul Islaam ay go'aansadeen inay xilka ka qaadaan xoghayaha warfaafinta ururka Xizbul islaam Shiikh Maxamed Macalin Cali.
Warkaan oo aan weli si rasmi ah u soo shaac bixin ayaa tibaaxaya in kulamo xiriir ah oo xalay illaa shalay ay lahaayeen hogaanka sare ee ururka Xizbul Islaam lagu go'aamiyey in xilka laga qaado xoghayaha warfaafinta ururka Xizbul Islaam.
Ilo muhiim ah ayaa sheegaya in Shiikh Xasan Daahir Aweys guddoomiyaha ururka Xizbul Islaam uu si weyn uga carooday hadalo maalmihii ugu dambeeyey uu saxaafadda siiyey xoghayaha warfaafinta ururka Xizbul Islaam Shiikh Maxamed Macalin kuwaas oo khilaaf ka dhex abuuray Xarakada Al-shabaab iyo Xizbul Islaam.
Lama oga cidda lagu badali doono xilka xoghayaha warfaafinta ururka Xizbul islaam marka si rasmi ah shaaca looga qaado in xil ka qaadis lagu sameeyey.
Shiikh Maxamed Macalin ayaa labo maalin kahor ku eedeeyey Xarakada Al-shabaab inay ka meer meerayaan in wada hadal lagu xaliyo khilaafka labada urur u dhexeeya, isagoona sheegtay mas'uuliyadda dagaalkii kadhacay deegaanka Dhooblay.
Mudugnet.com Xafiiska Wararka Magaalada Muqdisho
