Dadka ku dhaqan deegaanka Lafoole oo dhigay Mudaaharaad ay ku codsanayaan Biyo iyo Gargaar Beni aadanimo.
MudugNet, Muqdisho, arbaco, 24ka Feberaayo, 2010.
Barakacayaasha ku dhaqan deegaanka Lafoole ayaa maanta halkaas ka sameeyey banaanbax balaaran oo ay uga cabanayaan daruufo dhinaca nolosha ah oo halkaas ku heysta.
Banaanbaxayaasha oo u badnaa haween iyo caruur ayaa ka cabanaya biyo la'aan xooggan oo ku heysata deegaanka Lafoole, waxaana banaanbaxayaashu ay ku dhawaaqayeen erayo ay ku muujinayeen sida ay uga xun yihiin biyo la'aanta heysata.
"Biyo la'aan dooni mayno, waa in gargaar nalala soo gaaraa" ayey ku dhawaaqayeen banaanbaxayaasha oo socod ku soo maray deegaanka Lafoole oo ku yaala inta u dhexeysa magaalooyinka Muqdisho iyo Afgooye.
Dadka banaanbaxa dhigayey ayaa ka codsaday shacabka Soomaaliyeed iyo hay'adaha Samafalka inay gacan ka geystaan sidii ay u heli lahaayeen biyo, iyagoona sheegay in horay looga gooyey biyihi ay cabi jireen.Mudugnet.com Xafiiska Wararka Magaalada Muqdisho
