Ciidamada Ethiopia oo Xabsi dhigay Xildhibaano iyo Saraakiil ka tirsan Dowladda KMG Soomaaliya.
MudugNet, Muqdisho, Talaado, 23ka Feberaayo, 2010.
Ciidamada Ethiopia ayaa xabsiga magaalada Jigjiga U taxaabay 2 Xildhibaan oo ka tirsan baarlamanka dowlada KMG soomaaliya iyo sarkaal ka tirsan Ciidamada dowlada kuwaasi oo bishii aan soo dhaafnay lagu qabtay magaalada jigjiga ee dhulka ismaamulka soomaalida Ethiopia.
Xildhibaan C/raxmaan Maxamuud Cali oo ka tirsan baarlamanka soomaaliya ayaa saxaafadda u sheegay in 2 xildhibaan iyo sarkaal ka tirsan Ciidamada dowlada oo ka soo jeeda Gobolka Hiiraan isla markaana in mudo ah warkooda la wayay ay Ogaadeen in ay ku xiran yihiin Xabsiga magaalada Jigjiga.
Xildhibaan C/raxmaan ayaa sheegay in xildhibaanada iyo sarkaal ku xiran Jigjiga howlo shaqo ay u joogeen gobolka Hiiraan xiligii gobolka ay ku dagaalamayeen Ururka Shabaab iyo ciidamada dowladda Soomaaliya.
Xildhibaan C/raxmaan Maxamuud Cali ayaa ku tilaamay xariga Xildhibaanad mid sharci dari oo wax u dhimaaya xiriirka labada dal,isagoo ugu baaqay dowlada Ethiopia in si deg deg u sii dayso xildhibaanadda iyo sarkaalka dowlada.
Xildhibaan C/raxmaan ayaa ugu dambeyntii sheegay in xariga xildhibaanda iyo sarkaalka dowlada ay ku wargaliyeen Gudoomiyaha baarlamanka iyo Madaxweynaha wax ayna balan qaadeen in sida ugu dhaqsiyaha badan ay kala hadli doonaan Dowlada Ethiopia.
Gudoomiye kuxigeenka baarlamanka prof. Maxamed Cumar Dalxa oo ku sugan magaalada Nairobi ee dalka Kenya ayaa cambaareeyay xariga xildhibaanada isagoo ugu baaqay dowlada Ethiopia in ay dhawrto sharafta ay leeyihiin xildhibaanada Soomaaliyeed sida ay u ilaaliyo sharafta Xildhibaanadda Ethiopia.
Sidoo kale prof Dalxa wuxuu ugu baaqay xildhibaanadda Soomaaliya in ay faraha kala baxaan howlaha abaabulka ciidamada gobolada dalka oo howshaasi loo daayo hay’adaha amaanka Dowlada.
Mudugnet-Nairobi
Abdukadir Ahmed Olad
