Isbedel dhanka Maamulka ah ayaa maanta ka dhaqan galay gobalaa Bay iyo Bakool oo ay maamulaan Xoogaga Islaamiyiin ah oo mucaaradsan Dowladda Federaalka Somalia.

MudugNet, Muqdisho. Isniin, June 29, 2009.

Kulanka oo ay ka soo qeyb galeen saraakiil katirsan Al-shabaab iyo waxgaradka ku dhaqan gobolada Bay iyo Bakool ayaa waxaa xilkii wareejiyey guddoomiyihii hore ee Ururka Al-shabaab u qaabilsanaa gobolada Bay iyo Bakool Shiikh Xasan Abuu Ayman.

Shiikh Xasan Abuu Ayman oo ah guddoomiyihii hore ayaa kulanka ka sheegay inuu ku faraxsan yahay inuu xilka wareejiyo islamarkaana uu si wanaagsan ula shaqeyn doono ciddii la soo magacaabo.

Shiikh Mahad Cumar C/kariin ayaa loo magacaabay guddoomiyaha cusub gobolada Bay iyo Bakool ee Ururka Al-shabaab, waxaana uu kulankii lagu magacaabay ka sheegay inuu si hufan u gudan doono xilka loo magacaabay.

" Waan ku faraxsanahay xilka la ii magacaabay insha'alaahuna wada shaqeyn wanaagsan ayaan la yeelan doonaa bulshada qeybeheeda kala duwan" ayuu yiri Guddoomiyaha cusub ee la magacaabay.

Mudugnet.com Xafiiska Wararka Magaalada Muqdisho