Maxaakimta dowlada raacsan oo cambaareeyay duqaymaha ay AMISOM ka gaysato Magaalada Muqdisho

 

MudugNet, Muqdisho. Isniin, June 29, 2009.


Maxaakimta Islaamka ee taageersan dowladda Federaalka Somalia ayaa dhaliilay qaabka ay dowlada Federaalka Somalia u dhaqanto xilli dowladu ay dhawaan dalbatay Ciidan shisheeye oo ay Itoobiyaan kamid yihiin.
Sarkaal u hadlay Maxaakimta dowlada raacay ayaa sheegay in aysan raali ka noqo doonin duqaymaha ay AMISOM ka gaystaan Suuqa Bakaaraha iyo meelaha ay dadka Rayidka ah deganyihiin.

Ku simaha Afhayeenka Maxkamadaha Islaamka ee dowladda ku biiray C/risaaq Maxamed Qeylow ayaa ka dhawaajiyey inaysan marnaba raali ka aheyn in madaafiic lala dhaco goobaha ay shacabku ku dhaqan yihiin, waxaana uu sheegay inaysan la dhacsaneyn in la duqeeeyo suuqa Bakaaraha iyo deegaanada kale oo ay shacabku ku dhaqan yihiin.

Wuxuu ugu baaqay xoogagga Mucaaradka ah inaysan madaafiic ka dhex tuurin goobaha ay dadka shacabka ku sugan yihiin, waxaana uu tilmaamay in ganacsatada looga baahan yahay inay iska dhiciyaan kooxaha madaafiicda ka tuuraya suuqa Bakaaraha.

"Marnaba raali kama nihin in madaafiic lala dhaco suuqa Bakaaraha iyo deegaanada ay shacabka ku dhaqan yihiin" ayuu yiri C/risaaq Maxamed Qeylow afhayeenka Maxkamadaha Islaamka ee dowladda ku biiray.

Wuxuu intaas raaciyey inay ka war hayaan in guri ku yaala suuqa Bakaaraha gaar ahaan hareeraha shirkadaha uu saaran yahay Qori BKM ah oo rasaas loga soo tuuro xarunta madaxtooyada ee Villa Somalia sida uu hadalka u dhigay.

Mudugnet.com Xafiiska Wararka Magaalada Muqdisho