Madaxweyne Shariif oo Saxiixay in dalka Somalia lageliyo xaalad deg deg ah

 

MudugNet, Muqdisho. Isniin, June 22, 2009.
 

Madaxweynaha Dowladda Federaalka Somalia Shariif Shiikh Axmed ayaa aqbalay go'aankii ay dhawaan qaateen golaha Wasiirada Somalia ee sheegayay in dalka xaalad deg deg ah lagusoo rogay.
Shariif Shiikh Axmed oo shir jaraa'id ku qabtay madaxtooyada Villa Somalia ayaa sheegay in dalka Somalia uu galay xaalad deg deg ah laga bilaabo maanta isagoona cambaareeyay wax uu ugu yeeray ajaanib ku soo duushay.

Madaxweynaha ayaa carrabka ku adkeeyay in uu saxiixay go'aankii golaha Wasiirada ay dalka xaalad deg deg ah ku geliyeen islamarkaana ay ku codsadeen gargaar bada baadin deg deg ah.
" kadib markii aaan arkay go'aankii wasiirada ee xaalada deg dega ahaa waxaan go'aansaday in aan saxiixo si aan uga hortagno dhibaatada ay cadawgu nala damacsanyihiin" ayuu yiri Madaxweyne shariif.

Dhinaca kale Madaxweynaha dowlada ayaa sheegay in maalmihii lasoo dhaafay ay dalka soo galeen kooxo uu ugu yeeray ajaanib si ay uga barbar dagaalamaan Xoogaga dowlada kasoo horjeeda.
Go'aankan uu maanta ku dhawaaqay Madaxweynaha ayaan la ogayn sida uu wax uga bedeli karo dagaalada socda waxaana xusid mudan in dowladu aysan dalka wada maamulin.

Mudugnet.com Xafiiska Wararka Magaalada Muqdisho