Afeef: wararakani waa ka madax banaan yihiin kuwa xaqiiqda ah oo ay wariyaashu soo diraan MudugNet iyo tifatirayaashooduna mas'uul kama aha wixii khaladaad ah ee ku jiraa, marka laga reebo Abtidoon Baahalow oo ka mid ah Ururka Ahlu sunna wal Jameeca oo war bixintaan diyaarshay waana asaga iyo ilaahiis.
MudugNet.Warar dheeraad ah oo faahfaahsan oo ka soo baxaya Dagaaladaii shalay ka dhacay Deegaanada Hodan iyo Howl wadaag oo ay guulo la taaban karo ka soo hooyeen Ciidamada Xaq u dirirka Dowladda KMG ee Soomaaliya
MudugNet, Muqdisho. Arbaco, June 17, 2009.
Dagaaladii ugu qaraaraa oo ay shacabka ku nool xaafadda Hodan arkaan tan iyo sidii ciidamada Ethiopia waddanka looga saaray ayaa ka holcay degaano badan oo ka tirsan degmada Hodan.
Dagaalka ayaa ahaa mid qorsheysan oo ay Ciidamada Dowladda ay ku qaadeen fariisimada Kooxaha Mayalka adag ee nabad diidka ah xalaaleystayna dhiigga Islaamka, goobahaas oo ay ka mid ahaayeen Ex- Isbitaal Digfeer, Tarabuunka, Kaasa Popolaare.
Dagaalaka oo ahaa mid kadis ah ayaa isla markiiba dharbaaxo aan laga soo kabsan karin la gaarsiiyay nabad diidka magaca islaam ku qaraabta iyadoo saacado ka dib dariiqyada magaalada ay tubnaayeen meeydadka wiilal yar yar oo madaxa indhaha cimaamado cas cas uga duubnaayeen.
* Sarkaal ka mid ah saraakiishii Ciidanka Booliska ee dagaalka ku jiray ayaa gacanta ku dhigay 4 wiil oo da'dooda lagu qiyaasay 15 jir ilaa 16 jir oo dhaawac ka soo gaaray dagaalka kuwaas oo xanuun dartiis ooyayay, sarkaalaka oo ah aabe wax dhalay ayaa aad uga damqaday dhita heysata Ilmahaas yar yar oo la soo marin habaabiyay Amrayna inaan la dilin oo Isbitaalka la geeyo, iyadoo intii isbitaalka loo wadayna mid ka mid ah wiilashii dhaawacaahaa bastoolada la soo baxay kuna dhuftay Askartii isbitaalka u wadday mid ka mid ah halkiina ku geeriyooday (Naxariistii janno Allaha siiyee.
* Waxaa markiiba bastoolada ka qaaday Canugii sixranaa askari kale oo halkaa ku khaarijiyay Canugaas iyo saddexdii kale, warkaasna waxaan ka helnay Aabe ka mid ah Aabayaasha dhalay Afarta Caruur ah oo la sheegay iney u dagaalameyeen kooxda Caruurta adeegsata ee Alshabaab iyo xisbul Islaam.
* ilo wareedyo muhiim ah ayaa intaa raaciyay in jabka soo gaaray kooxaha huwanta Diinta ku qaraabata caruurtana adeegsada uu yahay mid aysan ka soo waaqsan karin lana sii eryayay ilaa Shiirkole Offishaale dhamaan goobihii dagaaladu ka dhaceen ay ku guul dareysteen iyadoo la xaqiijiyay shan ka mid hogaanaka sare ee kooxaha Diinta ku qaraabta lagu dilay goobaha dagaalka.
Dhanka Ciidamadii Dowladda Khasaarihii ugu weynaa wuxuu noqday Geeridii naxdinta lahey ee Sheekh Cali Saciid Xasan oo madfac la sheegay iney soo rideen Ciidamada Amisom uu ku dhacay isagaoo mararyay isgooyska wadada Kaasa Popolaare kuna sii jeeday African Village oo la sheegay iney baneeyeen Ciidamo daacad ah Yuusuf Indhacadde oo aanan la garan sababta ay u baneeyeen !
Geeridii taliyahii Ciidanka Booliska Gobolka Banaadir ka dib waxaa dib u soo laabtay ciidamadii ka dagaalamayay aagga hore ee shiirkole offishaale iyadoo warka ah in aaagag badan la baneeyay uu ku faafay ciidamada dhexdooda.
Dhanka Ciidamada Dowladda waxaa uga shahiiday ugu yaraan 5 askari oo uu ka mid yahay Taliye Cali Saciid Xasan Halka kooxaha baneeystay dhiigga Islaamka looga dilay tiro boqol kor u dhaafeysa oo caruur u badan.
Walow jab weyni gaaray Mayal adagtaiyo khawaarijta misna Dowladda ayaa u muuqata mid naf la caari ah oo aan wax horumar ah ka sameyn karin iyadoo haatan xaaladeedu tahay nin daad qqaday xumbo cuskay oo uu Madaxweyne Shariif naf ka doonay Warlordyadii Ilaah iyo rasuul ka furtay iyo rag aan sumcad islaanimo laheyn oo uu ka mid yahay Salaad Cali Jeelle .
*Isha wararkani waa waalidiin dhalay caruur qasab ugu dagaalameysa Alshabaab, waxaan heynaa sawiro badan oo mid ka mid Aabayaasha wiilashooda ku nafwaayeen dagaalkaan uu ku soo qaaday mobile phone kiisa sawiradaas oo aan indhaha la siin karin, balse uu noo sheegay inuu u soo qaaday si waalidiinta Ilmahooda ka maqan yihiin ay u kala ogaadaan ilmahooda geeri iyo nolol midda ay ku sugan yihiin.
Aabaha sawirada iyo wararka noo soo diray ayaa wiilkiisii ka mid ahaa kuwii la dilay iyagoo isbitaalka loo waday .Innaa Lillaahi wa Innaa Ileyhi raajicuun
Abtidoon Aw-Baahalow
Chibougamau, Quebec, Canada
