Ciidamo Itoobiyaan ah oo kaabiga soo saaray magaalada B/weyne gobalka Hiiraan

 

MudugNet, Muqdisho. Khamiis, July 02, 2009.
 

Ciidamo katirsan kuwa Cadawga Itoobiya ayaa bilaabay in ay soo kulaalaan magaalada B/weyne xarinta Gobalka Hiiraan oo ay kala joogaan Xoogaga Islaamiyiinta Mucaaradka ah iyo Ciidamo aan tira badnayn oo taageersan Dowladda Federaalka Soomaalia.
Ciidamadaan ayaa la sheegay inay saaka dhaqdhaqaaqyo ka wadaan tuulada Ceelgaal oo ku dhow magaalada Baledweyne, waxaana wararku sheegayaan inay ka soo kicitimeen deegaanka Kalabeyrka oo ay ku sugnaayeen maalmihii ugu dambeeyey.

Dad socota ah ayaa sheegay in ciidamada Itoobiyaan ah ay yihiin kuwa aad u qalabaysan ayna u muuqdaan kuwa ku wajahan magaalada Baledweyne oo qeyb kamid ah ay hadda gacanta ku hayaan xoogagga mucaaradka ee Xizbul Islaam iyo Al-shabaab.

Wararka naga soo gaaraya magaalada Baledweyne ayaa sheegaya in xoogagag Xizbul Islaam iyo Al-shabaab heegan buuxa la galiyey si ay dagaal ugala hortagaan ciidanka Itoobiyaanka ah ee ku soo wajahan magaalada Baledweyne.

Xaaladda magaalada Baledweyne ayaa ah mid aad u kacsan, waxaana dadku ay hadal hayaan imaatinka ciidamada Itoobiya ee deegaanka Ceelgaal oo aad ugu dhow magaalada Baledweyne.

Mudugnet.com Xafiiska Wararka Magaalada Muqdisho