(Qofkastaa waa raaci ama ilaaliye, qofkastana Allaah-SWT baa kula xisaabtami doona wixii ilaaliye looga dhigay, waa Xaddiis saxiix ah oo laga wariyay Nebiga-SCW).
 
 
Waa xaqiiq in maamulka hadda kajiraa Galmudug uu ku yara tilaabsaday xoogaa horumar ah oo xagga amniga, xiriirka arrimaha dibadda iyo canshuur uruurinta u badan. Galmudug waxay kasoo hooysay natiijooyin wanaagsan xiriirka arrimaha dibadda iyadoo ku heshay aqoonsi caalami iyo mid goboleedba. Taasi waxay keentay in Galmudug si rasmiya loogu casumo shirar caalami ah oo looga hadlayay dhibaatooyinka burcad badeedka, xasilooni kusoo celinta dalka Somalia iyo sidii dowlad rasmiya loogu dhisi lahaa dadka iyo dalka Somalia.
 
Shirarkaas caalamigaa oo ay Galmudug ka qaybgashay aaraana ka dhiibatay waxay ka kala dhaceen Nairobi, London iyo Kampala. Sumcadda iyo aqoonsiga heer caalami ah oo ay heshay  Galmudug waxay keentay in Hay'ada caalami ah oo ka shaqeeya hawlaha samafalka ay soo caga dhigtaan deegaanada Galmudug. Hay'adaha iska soo xaadiriyay Galmudug waxaa kamid ah US/AID, Unesco, UNDP, iwm. Hay'adahaan samafalku waxay deegaanka ka abuurayaan shaqooyin aad loogu baahan yahay islamarkaasna waxay fulinayaan mashaariic horumarineed iyo kobcinta khoritaanka dhaqaalaha Galmudug.
 
Xagga Amniga
 
Walow la isku dayay inla nidaamiyo oo la xoojiyo amniga, haddana sidii la rabay uma hirgalin waana arrimo salka ku haya dadka oo aan lahayn toowfiiq dhexdoodaa, biseyl muhiimadda dowladnimo iyo dhaqaale lagu bixiyo amniga. Xalka amnigu waxaa weeye in waxgaradku isku meel oga soo wada jeestaan sidii loo adkayn lahaa si horumar loo hiigsado. Waxaa kaloo dhabowday in hishiiskii labada maamul Galmudug iyo Puntland ay bishii April 2011 ku kula saxiixdeen magaalada Garowe uu noqday 'dhadooy roob ku mooday' iyo hal bacaad lagu  lisay. Sidii aan hore u qoray, nabadda iyo talada gobolka Mudug waxay ka go'daa oo kaliya dadka isku deegaanka ah ee Mudug. 
 
Wadashaqaynta Hay'adaha maamulka Galmudug
 
Sida ku cad wararka kasoo baxaya Galmudug, ma haagsana habsami u wada shaqaynta xukuumadda iyo Golaha barlamaanka, waana amuur ka dhalanaysa maamul xumo jirta oo u baahan in la saxo. Xukuumaddu waxay u xilsaaran tahay hawlaha la xiriira fulinta hawl maalmeedka iyo maamulka Galmudug, barlamaankuna wuxuu u xilsaaran yahay sharci dajinta, doorashada madaxda dowladda kolkii lagu hishiiyo iyo ansixinta golaha wasiirada marka uu Madaxweynuhu soo magacaabo. Hay'adda garsoorku iyadu waxay dhowrtaa oo ilaalisaa ku dhaqanka dastuurka u degsan Galmudug iyo fulinta hawlaha ku saabsan garsoorka guud ee dalka. Xukuumaddu waa in ay dhowrtaa karaamada barlamaanka oo si dhow ula shaqaysaa, barlamaankuna sidoo kale waa in uu dhowraa karaamada xukuumadda oo uu si dhow ula shaqeeyaa. Haddii Hay'ad waliba ay hawsheeda qaran u gudato si maamul wanaag ah oo waafaqsan dastuurka iyo xeerarka u degsan Galmudug, waxba ma xumaadeen.
 
Gunaanad
 
Waa hubaal in Galmudug ay horay u hinqatay. Waxaa mararakan loo baahan yahay in la sii xoojiyo, la dar dar galiyo oo wadajir garbaha looga qabto si diifta iyo darxumada looga baxo. Dowladi kuma dhisanto dhowr sano ee waxaa loo baahan yahay samir, dulqaad iyo toowfiiq midnimo si dowlad rasmiya dhidibada loogu aaso. Sidoo kale dowladi kuma shaqayn karto dhaqaale la'aan iyo adigu is-dabar, waana arrin u baahan in dibad iyo gudaba deg deg wax looga qabto si dhaqaale fiican loogu heli lahaa dowladda Galmudug inta ay ka gaarayso isku filnaasho. Waa in la garwaaqsadaa in xal u helidda arrimaha murugsan ee Somalia ay wali durugsan tahay loona baahan yahay in la taabagaliyo Galmudug dockastaba. Muran siyaasadeed waxaa la oogaa markii uu dan u yahay ummadda balse haddii ay dhibaato abuurayso lama kiciyo masiibada. Waxaa haboon in laga gudbo isqab qabsiga siyaasadeed oo aan cilmiga ku dhisneyn loona gudbo wax qabad, iskaashi iyo kala dambeyn iyadoo la raacayo hannaanka dastuurigaa ee dowladnimo. Xukuumadda waxaa la gudboon in ay kobciso hannaanka dowladda(structural development of the government) islamarkaasna ay muujiso wax qab iyo hawlkarnimo dheeraad ah. Qof walbow alle oga cabso xilka aad haysid kana soo dhalaal waajibka ku saaran.
 
Galmudug waxay u baahan tahay dad si daacadnimo ah ugu adeega ee uma baahna dad ku qaraabta.
 
Waxaa Qoray: Hassan S.A.Shirwa