SHACABKA GALMUDUG MA WUXUU DHAXAL U HELAY MAAMUL XUMO.,
By: Mustaf Hassan Ahmed (Qoyste), London-UK
Marka hore alle SWT ayey mahadi u sugnaatay alihi I waafijiyay inaan qoraal sameeyo waana uga mahadcelinayaa, intaas waxaan leeyahay dhamaan aqristayaasha mudugnet.com salaam qiima leh ayaan hawada idin soo mariyay mele waliba oo aad joogtaan, qoraalkan si qaas ah ugama hadlayo koox ama shaqsi gaar ah waxaan kaliya oo aan cabiray fikirkeyga wallow ayba qalad noqon karto hadana waxaa muhiim in la isku tixgaliyo fikradaha si loo helo afkaaro badan kadibna talo iyo tusaalaba looga qaato.,
Intaas kadib:,
Tan iyo waagii lagu dhawaaqay maamul goboleedka Galmudug state, ayaa waxaa soo maray marxalado mid kasta lahayd wayaheeda iyo wakhtigeeda, waxaa soo maray waayo badan oo farxadeed iyo kuwo baqdin iyo murugadooda lahaa, kuwaas oo ay dhamaantoodba ka soo gudubtay, waxa kale oo ilaa wakhtigaas Galmudug bar bar socday madax iyo aqoonyahan sar sare oo ka soo qaybqaatay sooyaalkeeda taariikheed, amaan iyo dhaliil wuxuu midkastaaba ka xambaartay,inkasta oo shaqsiyaad is bedelay mudadaas hadana waxaan marnaba is bedelin siyaasada sare ee lagu hago Galmudug taas oo iyadu ah mid aan geesna u dhaqaaqin oo aan wadan wax la taabto oo is bedel ah. iyada oo shacabka Galmudug tan iyo mudadaas ka dhignaayeen kuwo saaran doon bad weyn dhex taagan oo aan dhanna uga bixin biyahaas,doontaas oo ay ku dhacday nasiib daro kaga timi ama ka dhalatay Nakhuudaha iyo shaqaalaha kale ee ka qaybqaadanaya hagisteeda taas oo hadii aan laga kor qaadin ama laga bedelin naakhudaha degi doonta iyada oo ay suurto gal tahay in rakaabku gadoodo,rakaabkan oo ay ka muuqato rajo xumo weyn oo ay ka qaadeen hogaan xumida iyo daala-dhaca naakhudaha aan dhana u socon karayn shacabkan waa mid ay hareysay hogaan xumo xag kastaba ah,waa hogaan ku caan baxay , horumar la`aan kala qaybin,doorasho wasiro aan halbeeg laheyn oo uu ku hayo shacabka ,maanta wuxuu shacabka Galmudug ka taagan yahay hogaanka quus tii ugu dambaysay. waxaa hareeyey maceeshad xumo baahsan,nidaam la,aan tii ugu xumeyd iyadoo caruurtii yaryareyd laga kaxeysanayo goobaha waxbarasho meydkoodana laga helayo xashiishadaha , iyada oo dhibaatada iyo mustaqbal xumada deegaanku marayo uu xarkaha goosatay xataa aanay jirin cid ka damqanaysaa oo ka tirsan xaga maamulka. nolosha bulshada ayaa maraysa meel rajo la,aan ah., Tani maaha masiibo dabiici ah oo Alle umadan dusha ka saaray balse waa mid kaga timi xaga maamulkii ay iyagu doorteen oo ku dad-qalatoobay, dadku mahaystaan wax camal ah oo ay qabtaan cid u maqan iyo cid ka damqanaysa iyo cid ka warhaysaa midina meesha ma taalo, waxay u muuqdaan shacabkani mid iyaga damiirkooda loo ciqaabayo ka bacdi markii ay garan waayeen waxa u wanaagsan iyo wax u xun jirtaankooda umadeed , shacabkani waa mid jaahwareersan isla markaana mudo dheer oo ku dhaw nus qarni weli nasiib umay yeelan in ay helaan maamul wanagsan oo ka shaqeeya danahooda iyo waxay u doorteen , bal u fiirso kuwa ay doorteen iyo kuwa sugaya ee usoo hanqaltaagaya in ay xukumaan waa kuwo aan barnaamijkooduu waxba ku kala duwanayn oo u tar tamayawax aan jirin., maxaa dhacay shacabka galmudugow? miyaanad maqal oraahda leh qofka muslimka ah god laba jeer lagama wada qaniino ? shacabka galmudugow maxaad ula xisaabtami wayseen kuwaan madaxda idin ah? shacabka galmudugow samirkaagu miyaanu ahayn mid aqoon ku dhisan oo mudo leh ? mise waxaad samirkaaga ku sugaysaa baaba'aaga? shacaka Galmudugow ma idinkaa diyaar ah habsocodkan daciifka ah ee maamulka galmudug waxaynu daawanaa dhaqaale xumidda, shaqo la,aanta saameeyey nolosheenii gebi ahaanba, kaas oo gaaray, nolosha qoyskasta oo reer Galmudug ah. maanta,bal hoos u eeg nolosha ay ku sugan yihiin qoysas badan oo dan yar ah kuwaas deegaanka ku kala baahsan, kuwaas oo aan cidina u maqnayn ceelna u qodnayn, bal hoos u eeg mustaqbal xumaanta kumanyaal dhalin yaro ah oo aan haysan wax camal ah iyo wax ay qabtaan, bal hoos u eeg nolosha dadka Da,da ah ee aan haysan wax daawo ah oo ku filan, bal hoos u eeg inta ubad aan haysan wax barasho kadib markii waalidkoodii kari waayay fiigii schoolka, shacabkaw waa ayo cida aad sugaysaan mustaqbalka galmudug waa mid gebi ahaanba madaw oo gudcur ah., Waxaana hubaal ah in aan la isku dul noolaan doonin ee maalin uun shacabkani xisaabtami doono oo uu hurdada ka toosi doona.waxaa muuqanaysa waxyaabo badan oo Galmudug jiritaankeda dhaawac ku noqonaya,ama wax u dhimaya in ay sii jirto oo uu ku kacay maamulkan maanta jiraa ,sideedaba waxaa maamul dawlad-nimo oo meel ka taliya xididada u siiba marka uu kiishada ka buxsado, cadaalad-daro,musuq-maasuq, ku xadgudub xoriyada qofka,kala qaybin iyo iska horkeen umadeed.iyo dhaqaale xumo.intaas oo dhamaanteed ka muuqanaya muraayada hore ee maamulkeena. taasina waa nasiib daro weyn oo dhaxal u ah dhamaanba shacabka Galmudug., Waxaan qalbi murugoonaya ku sugi doona goorta shacabka galmudug xaqiisa heli doono iyo sida uu xaqiisa u dhacsan doono, taasina waa mid waayaha soo socdaa inooga jawaabi doonaan.,Wixii aan asiibay Alle ayey u sugnaatay wixii aan qalday sheydaan ayey ka timid, wixii talo ama tusaale waxaad igu soo hagaajin kartaan emailka: mustafahmed2011@gmail.com .,
Wabilaahi towfiiq.,
Mustaf Hassan ahmed (Qoyste), London-UK
